Procedura di keho

Kico ta un keho?

Gabinete di Gobernador ta defini un keho como un expresion di descontento por medio di palabra of por escrito, cu ta rekeri un respuesta. Esaki por ta un accion, un negligencia of un decision di e Gabinete y/of e calidad di servicio cu a wordo duna. Decisionnan cu ta basa riba contenido y cu tin su propio recurso legal por ehempel via un rijkswet of e Lar (Landsverordening administratieve rechtspraak), manera un peticion pa paspoort of declaracion di opcion, no ta cay aki bou.

Con por entrega un keho?

Un keho por wordo entrega por escrito na:

Gabinete di Gobernador di Aruba
Plaza Henny Eman 3
Oranjestad, Aruba.

Tambe un keho por wordo manda via e-mail na: info@kabga.aw.

Un keho mester tin e siguiente informacion: nomber, adres, telefon y e-mail di e persona cu ta haci entrega di e keho. Tambe e keho mester inclui un fecha, orario y un descripcion di e incidente. Sinembargo, tambe ta posibel pa haci un keho den forma anonimo. Ora un keho tin tur e informacion necesario, e persona concerni lo ricibi un confirmacion dentro di un siman di Gabinete di Gobernador cu esaki a wordo ricibi bon.

Con un keho ta wordo registra?

Kehonan cu drenta ta wordo registra den e sistema di documentacion y maneho (DMS) di Gabinete por medio di e empleado di DIV. Segun ta posibel e siguiente datonan ta wordo registra den e sistema: e identidad di e denunciante, su datonan di contacto, un resumen cortico di e keho, e fecha cu a ricibi e keho y un number den e sistema. Tambe e dossier ta inclui e resultado di e investigacion di e keho, e decision cu a wordo tuma y cualkier otro corespondencia concerni.

Con e kehonan ta wordo investiga?

E meta di e investigacion di un keho ta pa clarifica si e keho tin fundamento of no  y unda e responsabilidadnan ta sinta den e caso en cuestion. Mirando e echo cu gran mayoria di contacto cu cliente dentro di e Gabinete ta tuma luga na e departamento consular, en principio e director suplente di e Gabinete ta esun responsabel pa realisa e investigacion concerni. Dependiendo di e tipo di keho por wordo desvia di esaki.

Den e investigacion ambos partido ta wordo scucha, tanto  e denunciante como tambe internamente den e organisacion. Den e investigacion ta tene cuenta cu e siguiente factornan: e echonan, e circunstancianan, e posibel causa, e tipo di keho, e seriedad di e caso y tambe si a sufri cualkier desbentaha of daño. E investigacion lo wordo completa si ta posibel dentro di cuater siman despues cu e keho a wordo registra.

Reaccion di parti di Gabinete na e denunciante

E denunciante lo ricibi dentro di dos siman despues cu a finalisa cu e investigacion un respuesta por escrito for di Gabinete. E carta aki lo encera na ki manera e investigacion a tuma luga, e echonan cu a sali afo y con tur esaki a wordo evalua. A base di e resultado lo considera si e keho tin fundamento  of no. Kehonan tocante un evento cu a sosode mas cu dos luna anterior en principio no lo wordo trata. E denunciante lo wordo informa di esaki por escrito.

Den caso cu un keho no tin fundamento, esaki lo wordo demonstra na e denunciante a base di analisis di e echonan y/of riba mas tanto informacion obteni obhetivamente y verificabel.

Un splicacion personal di e resultado semper ta posibel.

Si resulta cu un keho tin fundamento, e denunciante lo ricibi un disculpa por escrito. Adicionalmente lo por tuma luga un combersacion personal si ta desea esaki. Tambe cualkier daño (rasonabel) eventual cu a wordo ocasiona door di un keho, lo por wordo compensa door di Gabinete na e denunciante.

Ademas, e medidanan tuma pa loke ta trata e keho specifico y inidividual ta wordo delinea na e denunciante y ta wordo indica cua accionnan organisatorio y/of structural a wordo tuma pa evita kehonan similar den futuro.

Si un keho wordo entrega anonimo, e maneho di esaki y cualkier consecuencia organisatorio, lo keda dentro di e Gabinete.

Contacto despues

Den cuadro di diligencia, cierto casonan lo por bin na remarca pa por tuma contacto cu e denunciante despues di algun tempo, pa asina por determina si e caso a wordo atendi satisfactoriamente.