Un visa ta un autorisacion of decision pa estadia temporal of transito na un pais. Un persona cu ricibi un visa, ta haya un sticker den su paspoort of un otro documento di biahe valido.
Na e momento cu un persona ricibi e visa, no tin obhecion contra su entrada na e pais di destino. Un visa por ta necesario tambe pa por sigui biaha pa un tercer pais. Ta importante pa sa cu posesion di un visa no ta duna derecho irevocabel di entrada. Na entrada na e pais mester demostra tambe cu ta cumpli cu e condicionnan di entrada.
Na Gabinete di Gobernador di Aruba por haci entrega di un peticion pa un visa Caribense of pa un visa Schengen.
Residentenan di Aruba cu no ta dispone di e nacionalidad Hulandes den cierto caso, mester pidi un visa Caribense. Nan mester esaki posiblemente pa haya admision na e otro partinan Caribense di Reino Hulandes, esta Boneiro, Corsou, Saba, Sint Eustatius y Sint Maarten.
Visa pa 90 dia of menos
Den caso cu ta biaha pa e otro partinan Caribense di Reino Hulandes pa 90 dia of menos, en principio ta necesario un visa Caribense pa estadia cortico. Persona cu un visa asina por permanece te un maximo di 90 dia (dentro di un periodo di 180 dia) ariba e islanan menciona. E obligacion di tin e visa conoce algun excepcion, manera describi aki.
Pa ken e no ta necesario?
Un visa Caribense no ta un exigencia pa personanan cu un nacionalidad cu ta aparece riba e lista di nacionalidad liber di visa. Por ehempel Merca y paisnan di Union Europeo. Persona cu ta di transito of cu ta biaha cu crucero, no mester pidi un visa Caribense. Si nan mester, ora cu nan biaha pa partinan Caribense di Reino, cumpli cu e exigencianan di acceso pa biahe liber di visa.
Estadia di mas di 90 dia
Persona cu ta desea di permanece pa mas di 90 dia na e otro partinan Caribense di Reino, mester di un permiso di estadia. E persona mes no por pidi un permiso di estadia. Pa esaki e mester di un referente. Por ehempel su partner of su dunado di trabao. Pa e procedimento di peticion ta conseha pa bo tuma contacto cu autoridadnan local di Aruba, Boneiro, Corsou, Saba, Sint Eustatius of Sint Maarten.
Persona cu no ta dispone di nacionalidad Hulandes, den cierto caso mester pidi un visa pa admision na Hulanda. Esaki ta conta tin biaha tambe pa otro paisnan di teritorio Schengen. Gabinete di Gobernador di Aruba ta tramita peticion pa visa pa teritorio Schengen solamente di persona cu permiso di estadia valido pa Aruba. Tambe nan destino principal mester ta Hulanda, Belgica, Estonia, Francia, Hungria, Islandia, Italia, Lituania, Luxemburg, Noruega, Austria, Portugal, Spaña, Suecia of Suiza. En conexion cu COVID-19 e paisnan menciona por tin condicion di entrada adicional. E autoridadnan local di e pais concerni por informa e viaheronan tocante esaki.
Visa pa 90 dia of menos
Persona cu un visa Schengen di estadia corto por biaha libremente pa Hulanda y otro paisnan Schengen te cu un maximo di 90 dia (dentro di un periodo di 180 dia).
Pa ken e no ta necesario?
E paisnan di Schengen tin acuerdo haci cu cierto pais. Posiblemente un persona no mester di un visa. Esaki por controla riba e Schengen Visumwijzer.
Estadia di mas di 90 dia
Personanan cu ta desea di keda mas di 90 dia na Hulanda, posiblemente mester di un visa pa estadia largo. Por ehempel pa keda pa trabao, estudio of pa bay biba cerca famia na Hulanda. Tin ora e persona mester un permiso di estadia. Un visa pa estadia largo yama tambe un autorisacion pa estadia provisional (machtiging tot voorlopig verblijf, mvv). Si un persona mester di un mvv y/of permiso di estadia, ta depende entre otro di su nacionalidad y obhetivo di estadia. Por haya mas informacion tocante e mvv na departamento di asuntonan consular. IND por duna informacion tocante permiso di estadia pa Hulanda.
Visa di transito
Personanan cu ta desea di biaha via un pais Schengen pa un pais cu no ta pertenece na Schengen, posiblemente mester di un asina yama visa di transito. Ta trata di viahenan via Hulanda, Belgica, Estonia, Francia, Hungria, Islandia, Italia, Lituania, Luxemburg, Noruega, Austria, Portugal, Spaña, Suecia of Suiza. Cu un visa di transito un persona por solamente pasa pa un otro avion rumbo pa un destino fuera di e teritorio Schengen. No ta permiti pa e bandona e zona internacional di e aeropuerto. Tampoco pa busca bo ekipahe. E persona pues nó tin acceso na e teritorio Schengen. Si mester, por entrega un peticion pa un visa di transito cerca e departamento di asuntonan consular.
Procedimento di peticion
Si un persona tin obligacion di visa of no, por varia pa cada caso y cada situacion. Mescos ta conta pa e documentonan rekeri pa tuma e peticion pa visa pa tramita. P’esey ta consehabel pa tuma contacto di antemano cu e departamento di asuntonan consular di Gabinete di Gobernador di Aruba. Si resulta cu e persona enberdad ta obliga di tin visa, mester traha un cita pa entrega e peticion. Tene na cuenta cu tin un periodo di espera di dos luna pa un cita. E tempo di tratamento tambe ta dos pa tres siman.
E duracion lo ta mas largo pa pidi y tramita durante periodonan di vacacion y durante dianan di fiesta.
Costo
E tarifa pa e visa Caribense na 2026 ta: Afl. 163,25
E tarifa pa e visa Schengen na 2026 ta: Afl. 183,65
Cita
Por mira e datonan di contacto pa haci un cita riba e pagina di contacto aki.