Autoridadnan
E posicion y papel di Gobernador ta regla den algun ley di Reino y Decreto Real. Por ehempel: Statuut di Reino Hulandes, Constitucion di Aruba y e Reglamento pa Gobernador di Aruba.
Gobierno di Aruba ta forma pa e Rey y e ministronan. Gobernador di Aruba ta representa e Rey na Aruba. E Gobernador como tal ta na cabes di gobierno Arubiano. Si Gobernador ta asisti na un reunion di Conseho di Ministro di Aruba, e ta actua como presidente. E tin den e caso ey un voz como consehero.
Como hefe di gobierno, Gobernador tin e derecho di wordo consulta pa e ministronan, di encurasha y di adverti e ministronan (the right to be consulted, to encourage and to warn).
Responsabilidad
Gobernador ta intachabel, e ministronan ta responsabel. E ministronan ta responde pa e actuacion di e Gobernador como organo di e pais, na parlamento di Aruba (Staten).
Tarea y autoridad
Como hefe di gobierno di e pais, Gobernador ta eherce entre otro e siguiente tarea y facultadnan:
- Firmamento di ordenanza y decretonan nacional;
- Huramenta ministro, miembro di parlamento (Staten), miembro di Conseho Consultivo (Raad van Advies) y miembro di Contraloria General (Algemene Rekenkamer);
- Huramenta hueznan, miembronan di Ministerio Publico y e comisario, presidente y directornan di Banco Central di Aruba;
- Duna apertura na aña parlamentario riba e di dos diamars di september. Aki ta duna un presentacion di e proximo maneho di gobierno;
- Nombra informador y formador den cuadro di formacion di un gabinete nobo.
Como representante di gobierno di Reino, Gobernador ta vigila interes general di Reino. Den e capacidad aki Gobernador ta responsabilisa na gobierno di Reino.
Proclamacion di ley y implementacion di areglo
Gobernador ta percura pa proclamacion na Aruba di leynan di Reino y di medidanan general di gobernacion di Reino (algemene maatregelen van rijksbestuur). Tambe Gobernador ta percura pa implementacion di areglonan legal di Reino y tratadonan cu ta vigente pa Aruba. Ademas e ta supervisa e cumplimento cu esakinan.
Supervision
Gobernador no ta formalisa un ordenanza of decreto nacional ora e ta considera esaki en pugna cu Statuut. Of cu un tratado of un ley di Reino. Tampoco cu un medida general di gobernacion di Reino, of si e ta considera esaki en pugna cu derecho humano, cu seguridad legal of cu bon gobernacion.
Forza militar
Si Conseho di Ministro di Reino aproba esaki, Gobernador por dispone di e forzanan militar di Reino pa defensa di e pais. E ta faculta tambe pa pone parti di e forzanan militar na disposicion di gobierno di Aruba pa mantene seguridad y orden publico (asistencia militar) of den caso di desastre of accidente.
Demas autoridad
Por lo demas Gobernador, como organo di Reino, ta responsabel pa:
- Emision di paspoort Hulandes, paspoort di emergencia y ‘laissez-passer’;
- Emision di visa pa teritorio Schengen (Union Europeo);
- Aceptacion di peticion pa nacionalidad Hulandes (naturalisacion);
- Otorgamento di nacionalidad Hulandes (opcion);
- Asesora encuanto y efectua entrega di condecoracion Real;
- Extradicion, of no, di personanan na un otro Estado.