Encargonan

Gobernador ta ricibi personanan den audiencia practicamente tur dia. Ministro presidente ta cerca Gobernador tur siman pa un audiencia. Ta invita e demas ministronan en principio cada dos luna pa audiencia. Durante di e combersacion nan ta informa Gobernador di e desaroyonan riba e terenonan corespondiente di maneho. Ademas Gobernador ta ricibi ministro di e otro paisnan di Reino, embahador y consul. Representante di organisacion y empresanan gubernamental y di organisacionnan priva tambe ta pasa cerca Gobernador pa un audiencia periodicamente. Gobernador por ricibi personanan den audiencia tambe riba nan propio peticion. Por ehempel, un autor por haci un peticion pa ofrece Gobernador e prome ehemplar di un buki.

Gobernador ta haci bishita na empresa of instancia na Aruba pa laga informa su mes y pa haya un bon imagen di un cierto situacion. Bishitanan di trabao ta tuma luga riba invitacion of iniciativa propio. Gobernador ta haci bishita oficial tambe na otro partinan di Reino. Por ehempel, pa celebracion di dia di fiesta nacional manera Dia di Himno y Bandera, of pa asisti na Discurso di Rey (Troonrede) durante Prinsjesdag na Den Haag. Gobernador tambe regularmente ta haci un bishita na Rey, ministronan Hulandes y vice-presidente di Raad van State na Hulanda.

Gobernador ta consulta periodicamente cu Gobernadornan di Corsou y Sint Maarten. E Gobernadornan ta informa otro tocante asuntonan actual cu ta hunga un papel importante den nan pais. Tambe nan ta papia tocante asuntonan den cual interes di Reino ta envolvi. Ademas ta tuma lugar regularmente consulta entre e tres Gobernadornan y e ministro of secretario di estado di Asuntonan Interior y di Relacionnan den Reino (Binnenlandse Zaken en Koninkrijksrelaties).

Gobernador ta invita tur ministro di Aruba pa un lunch conhunto algun biaha pa aña. Durante e lunch di Conseho di Ministro aki ta papia tocante temanan cu pa e papel di Gobernador ta di importancia.

Diferente funcionario, prome cu nan asumi nan puesto, ta expresa, dilanti Gobernador, nan huramento of declaracion, y promesa. Esaki ta conta pa entre otro ministro, miembro di Parlamento, miembro di Conseho Consultivo (Raad van Advies), miembro di Contraloria General (Algemene Rekenkamer), Procurador General y hueznan

Riba e di dos diamars di september Gobernador ta habri e aña di sesion di Parlamento. Durante di e reunion aki Gobernador den su discurso ta informa tocante di e maneho proximo di gobierno.

Algun biaha pa aña Gabinete di Gobernador ta organisa un ceremonia di naturalisacion. E ceremonia aki ta e ultimo elemento di un trayecto largo cu ta conduci na haya nacionalidad Hulandes. E Hulandesnan nobo ta expresa dilanti Gobernador e huramento of declaracion y promesa.

Anualmente Gobernador ta haci entrega di e condecoracionnan Real na e ciudadanonan di Aruba cu a duna muestra di un aporte special na comunidad. Desde antaño e momento festivo aki, tambe yama 'Algemene Gelegenheid’ (Ocasion General), ta relaciona cu cumpleaños di Su Mahestad Rey.

Riba 4 di mei Gobernador ta pone un krans na e Monumento di Schutterij y Vrijwilligerskorps Aruba. Cu esaki ta conmemora e victimanan cu den nomber di Reino a perde nan bida den situacion di guera y den operacionnan di paz. Dentro di henter e Reino tradicionalmente ta tene dos minuut di silencio durante di e Conmemoracion di Defuntonan.