Bandera Distintivo

Hoge Raad van Adel a conseha encuanto e diseño di e bandera distintivo. E Decreto Real a drenta na vigor dia 1 di januari 1986. E fecha ey Aruba a adkiri e status di pais den Reino y e prome Gobernador a asumi puesto.

Aumenta imagen

Den articulo 1 di e Decreto Real ta describi e bandera distintivo di Gobernador di Aruba como lo siguiente:

E bandera distintivo di Goberbador di Aruba ta un bandera rectangular, di cual e largura tin un corelacion cu e altura di 3:2, cu na banda ariba y abao un patronchi di strepi cora, blanco y blauw cu ta sigui otro den e colornan di e bandera Hulandes, cada un cu un hanchura igual na un-diesdos parti (1/12) di e bandera. E tres strepinan ariba y abao ta separa di otro pa un parti blanco, riba cual den centro tin un circulo cu un diametro di cinco-diesdos parti (5/12) di e altura di e bandera. Riba e parti circular aki tin poni un strea di cuatro punta y dos strepi horizontal. E punto central di e circulo ta na un distancia di cinco-cuarentiocho parti (5/48) di e altura di e bandera inmediatamente riba e centro di e parti circular. E forma y e altura di e strea ta similar na e forma y altura di e strea di e bandera di Aruba. E dos strepinan horizontal ta relativamente na mesun haltura y ta, cu excepcion di e lugarnan unda nan ta toca e partinan rondo di e parti circular, relativamente mes hancho cu den e bandera Arubiano. E parti circular, e strea y e dos strepinan horizontal ta traha den e colornan di e bandera di Aruba.

E bandera distintivo di Gobernador ta colga na tres localidad ora Gobernador ta na Aruba: na e Gabinete di Gobernador, na Cas Ceremonial di Gobernador y na e residencia di Gobernador. Ora Gobernador ta den exterior, ta baha e bandera di distincion. Ademas ta hiba un bandera di distincion di tamaño reduci riba A-1 (auto oficial di Gobernador), ora cu Gobernador ta haci uso di e esaki.